مقال بعنوان (ليطمئن قلبي)

منقول
(((((( ليطمئن قلبي ))))))

بسم الله الرحمن الرحيم

يمكن ده أطول بوست أكتبه في حياتي يخص الباي او غير الباي ، ولكن لأهميته القصوي كان لازم أعمله .
كتير منكم ما يعرفنيش لسه علشان أنا جديد معاكم في جروب الفيس اللي هو بالمناسبة أكبر جروب باي للوطن العربي كله ما شاء الله :hibiscus: ، و ده تقصير مني علي الرغم من اني دُعيت أكتر من مرة اني أكون معاكم من أخويا اللي أقرب ليا من نفسي المهندس نور الدين.
أنا معاكم من شهر تقريباً و ده يمكن سابع او تامن بوست اكتبه هنا ، و لكني بكتب عن الباي من قرابة السنتين علي جروبات التليجرام و بالتالي أنا معروف هناك و ليا اخوات كتير في الله من مجتمع الباي العظيم ، و أتمني عدد اخواتي في الله يزيد بوجودي معاكم و تشوفوا ان اللي بكتبه انا و كل اخواتي المسؤولين  هنا عن مشروع الباي له فايدة و يخليكم تحسوا بقيمة اللي معاكم اكتر و اكتر بإذن الله.

للي ما يعرفنيش ، أنا أخوكم في الله هاني محمد الهادي ، دكتور صيدلي خريج جامعة القاهرة ، حاصل علي MBA من الجامعة الأمريكية بعد تخرجي و بعدين اشتغلت في الخليج في شركة Glaxo Smith kline لحد ما رجعت مصر نهائي من ٦ سنين و من ساعتها و انا سايب مجال الصيدلة تماماً و كل اهتمامي هو مشاريع العملات الرقمية و دراسة ال white papers و التداول البسيط.
خلال شغلي في GSK حضرت كورسات كتير عن ال analytical thinking و ال project management و الfinance for non financials
و غيرها من الكورسات المكثفة اللي ساعدتني جدا بعد كده في حياتي و ازاي افكر و انا بدرس و احلل اي مشروع قصادي ..
بجانب شغلي و مجال الكربتو العام  ، فأنا ليدر كل الدول العربية لتطبيق Coinskro الفائز بآخر هاكاثون .. أدمن و مساعد في  Pi chain mall Egypt تحت قيادة أخويا محمود الشريف .. أدمن و مساعد في pi chain mall middle east تحت قيادة اخويا نور الدين.

معلش طولت عليكم ، بس كنت حابب اربط بين خبرتي في الحياة و تحليلي لمشروع الباي و ليه أنا مؤمن بيه إيمان مطلق انه اتوجد علشان حياتنا كلها تتغيير بسبب توفيق ربنا لينا  وانه اختارنا نكون رواد في ذلك الصرح الضخم ( الباي )

اختيار اسم البوست (( ليطمئن قلبي )) سببه الرئيسي اني عملت تصويت علي جروب التليجرام ، هل احنا علي يقين عقلي و قلبي ب مشروع الباي ولا قلوبنا خايفة : خبر يفرحناااااا اووووي و خبر يوقع قلوبنا في رجلينا و نحبط .. كانت النتيجة ان 33 %
من رواد الباي عندهم تشكك و أحياناً بيحسوا ان الباي هي خدعة القرن و قلوبهم بتقع..

انا بكتب البوست ده النهاردة مش علشان اقولكم نقاط القوة في الباي لأنها لا تحصي و لا تعد ..
‌‎هطمنكم انا بكام كلمة سريعة موجزه و بعدين ندخل في موضوعنا :

مؤسس العملة دكتور جامعي في واحده  من أرقي الجامعات المرموقة ستانفورد

له اوراق بحثية من ايام البتكوين

و استاذ ل مؤسس الايثيريم

اشتغل علي مشروع الباي من ٢٠١٦

و عرفنا عنه في ٢٠١٩

و لحد ٢٠٢٣ ما انطلقش

مأسس شبكة هي الاقوي

و الاسرع

و الاكثر امان

و مشروع متكامل  هو الأقرب لحل مشاكل ال trilemma اللي بتواجه كل شبكات العملات المشفره

‏( decentralization, security, scalability )

لأول مرة نشوف عملة رقمية لها استعمال حقيقي

اول مرة نفهم web3 هو ايه لما شفنا تطبيق الfireside

عامل تطبيق و براوزر خاص متكلفين ملايين ( طيب مين صرف الملايين دي ؟ )

من ٢٠١٠ للان مافيش قوانين تنظم السوق ده كله

بتطلع دلوقت مع بوادر ل انهيار الإمبراطورية الأمريكية

اربط كله ببعضه في دماغك

‌‎و قولي شايف ايه ؟

كل ده انتم حافظينه اكتر مني و مليون أخ فاضل اتكلم فيه..

احنا النهاردة هنتكلم عن مخاوف الناس من المشروع ، كل تخوف جالي علي الخاص هكتبه و هندردش فيه بإذن الله ، و علشان ما تحسش انه اطول بوست في التاريخ عدي بعينك علي التخوفات اللي هعرضها ، لو التخوف ده عندك جواك اقراه و شوف ردي يمكن اقنعك و تتطمن زي ما انا متطمن ، و لو التخوف المذكور مش عندك يبقي ما تضيعش وقتك فيه..

إن أصبت فمن الله ، و إن أخطأت فمن نفسي و الشيطان

يلا بينا ….و استحملوني علشان انا لما بكتب لازم اكتب بالتفصيل الممل  و رغاي :sweat_smile:

—————————————————————-

١- دكتور هاني ، انا شايف انه مشروع جيد و له مستقبل و لكن شايف ان سعر العمله لن يتعدي ال ٣٠٠ دولار
و مش مقتنع ابدا ان الباي ممكن تكون عملة تسوية دولية
بوجهلك التساؤلات دي يا دكتور هاني يا محترم عشان بحب كلامك البسيط الواقعي

الإجابة :
كون انك مقتنع جدا بالمشروع ، ده في حد ذاته نجاح منك ، لأن غيرك للآسف مش فاهم المشروع اصلا و بيحسبه علي انه مشروع عادي خاضع لقوانين سيولة الماركت كاب ، اللي هو طبعا زي ما احنا عارفين حاليا في حدود ال 1.2 ترليون حاليا و طالع نازل نتيجة مضاربات حيتان الكربتو.

الباي مش عملة منصات و إلا كان الكور تيم وافق و بارك اللي حصل وقت هجمة المنصات علي إدراج الباي… الباي عملة market utility مش market cap
نقطة انها لن تتخطي ٣٠٠ دولار : راجع البوست ده هتلاقي فيه الدلائل العقلية انها اكيد بإذن الله هتتخطي ال٣٠٠ بكتير ، مش لازم في لحظة انطلاقها ، ولكن حسب مسارها اللي هتاخده هتفضل قيمتها تزيد بإذن الله سواء تدريجي بسيط او علي شكل صاروخي

بالنسبة لنقطة عدم اقتناعك الكامل بإنها ممكن تكون عملة تسوية عالمية :
هقولك كلنا عارفين علم اليقين ان العالم كله بيتغير للرقمنة و عملات الCBDC اللي خلاص علي وشك الاصدار .. يعني عملة التسوية القادمة لازم رقمية و لازم بلوكتشين تتحرك من خلاله.
مش هقولك ان الباي ١٠٠ ٪؜ هي عملة التسوية القادمة ، لكن هقولك ان ال attributes بتاعتها و مواصفاتها و قدراتها تؤهلها انها تنافس بشراسة علي إن يحصل عليها اتفاق و إجماع عالمي ، قد تكون و قد لا تكون هي المختارة و لكنها مرشحة ب قوة.
و لو ما  بقيتش عملة التسوية العالمية الأم فهي أكيد واحدة من الشبكات اللي هيتم الاعتماد عليها و لو حتي بشكل بسيط في ظل النظام المالي الجديد.
مافيش حد هيجبرك انك تتقبل انها مليون في المية عملة التسوية القادمة ، مؤهلاتها تؤهلها اه و لكن علم المستقبل غيبي عند الله فقط .

و بالنسبة لموضوع 314,159 ، طبعاً ده قتل بحثاً بس نلخصه بسرعة ..
نيكولاس اتجوز شينجداو فان ( ألف مبروك ) هو عبقري بلوكتشين و هي دكتورة anthropology
يعني علم دراسة الإنسان و سلوكياته ، و ازاي تأثر علي الرأي العام و تعدل سلوكه و تزرع افكار في العقل الباطن و الوجدان الجمعي .
الدكتورة فان بتاعة العيار اللي ما يصيبش يدوش.
لو نجحوا يخلوا القيمة ٣١٤ الف خير و بركة ، حد يكره ؟؟ طيب لو ما نجحوش ؟ يبقي علي الاقل نجحوا يخلونا كلنا نؤمن بفكرة ان الباي لها قيمة ثمينة ما نفكرش نفرط فيها ابدا بدولارات معدودة .

———————————————————-

٢- يا دكتور هاني انا خايف المشروع يطول اكتر من كده

الإجابة :
فيه مليون دليل ان استفادتنا من الباي قربت جداً جداً

- [ ] لو اعتبرت ان الباي مشروع سياسي و عملة تسويه : يبقي أديك شايف الاحداث السياسية و الاقتصادية و افلاس البنوك العالمية شكله عامل ازاي ، العالم كله مضطرب و كنت حطيت بوست عن ray dalio و كتابه عن سقوط الامبراطوريات هتعرف ان النظام المالي القديم بينتهي خلاص و بنبدأ النظام المالي الجديد
‏

- [ ] ولو اعتبرتها عملة مقايضات فقط و ايكوسيستم فريده من نوعها ، يبقي قربت جداً برضه ، الكورتيم عمل ٢ هاكاثون في سنة ، و بعدين أعلن انه هيخلي الهاكاثون شهري.
عااااوز تطبيقات كتييير و شغل
و هيدفع جوايز فلوس و باي من جيبه
تفتكر هيفضل كل شهر يدفع من جيبه ملايين و هي هتنزل ٢٠٢٧ مثلا او ٢٠٢٥ حتي ؟!

توقعي الشخصي في عجالة :
استحالة يمر علينا شهر ٨ و ٩ الا ولازم نكون اتطمننا علي الاخر و احتمال كبير جداً نبتدي نستفاد من الشبكة المغلقة ، اللي علي الورق بقالها سنة و شوية لكن في الحقيقة الشبكة المغلقة الحقيقية اللي الكل هيستفاد منها منتجات و خدمات لم تبدأ بعد.
و الشبكة المفتوحة تيجي براحتها ٢٨/١٢/٢٠٢٣ او ١٤/٣/٢٠٢٤  ، مش هتفرق معانا كتير صدقوني لو الشبكة المغلقة الحقيقية اتفعلت:ok_hand:

———————————————————

٣- ازاي يا دكتور بس العملة دي هيكون ليها قيمة حقيقية و هي بتتباع بين الناس بدولار و والله ساعات بسنتات كمان ؟!!

الإجابة :
انا شايفها نقطة قوة مهووولة للعملة ، عملة قيمتها علي الورق = صفر ، احنا عملنالها قيمة بمقايضتنا ليها ، طبقنا عليها تعريف كلمة عملة أصلا ، بإننا قبلنا ان لها قيمة ، و ده انجاز في حد ذاته .
النقطة الأهم هنا ان طالما ناس باعتها ب دولار ده معناه ان ناس تانية اخدتها ب دولار ( منطقي :sweat_smile:)
تفتكروا مين الأذكي ؟ اللي باع و لا اللي اشتري ؟
لو فرضنا فرضية جدلية ان كل المؤمنين بالباي طلعوا مش فاهمين اي حاجة خالص و طلع سعرها ٢-٣ دولار بعد الهري ده كله ، يبقي اللي اخد باي ب دولار ضاعف راس ماله ٢-٣ اضعاف ، و اللي باع فرط بالرخيص ،،،، يبقي مين الاذكي ؟ ( ده علي افتراض انها ب ٢-٣ دولار في الاخر فتخيل لو ب ٣٠٠ دولار ، تخيل ١٠٠٠ ، تخيل ٣١٤ الف ، الخ الخ )
كل اللي فهموا قوة المشروع و عندهم القدرة الشرائية بيعرضوا في المول منتجات مقابل باي او بيجيبوا باي بطرق اخري معروفة و بما اني ليدر العرب في ال coinskro فشايف كل حاجة بتحصل ، انا شخصياً اعرف اصدقاء شخصيين ليا  و بيجيبوا باي من دول خارج نطاق الوطن العربي ماعندهمش اي شغف ب الباي  ب ٨٠-٩٠  سنت ( طبعاً مش بشجعكم علي كده نهائي لأن ٩٩،٩٩٩٩ من تعاملات الباي نصب في نصب و تهكير و خلافه )
الفكرة هنا انك لو مؤمن بمشروع الباي و عندك مقدرة تزود باي يبقي ليه لأ ، فكر بنفسك و بهدوء ازاي تزود اللي في محفظتك بدون ما تكون بخست اخ ليك حقه او استغليت حاجته المادية ( نقطة اخلاقية مهمة جداً )

——————————————————-

٤- يعني لو فرضنا ان الباي ب ١٠٠٠ دولار مثلا ، ماهو يعني بالعقل كده لو نزلت التطبيق و دست الزرار الصاعق ده شهرين و عملتلي ١٠٠ عملة بقيت مليونير ، طيب لو الكوكب كله بقي مليونيرات من الباي ، كده قول علي الدنيا السلام ، مين مليونير هينزل يشتغل و يتمرمط ؟؟؟!

الإجابة :
اولا انت حسبت كل عملاتك ، مش عملات تعدينك الشخصي فقط اللي حالياً حوالي ٧ في الشهر 
ثانياً لو فرضنا حتي ان ٧ عملات شهري و هي ب ١٠٠٠ دولار ، ده معناه دخلك الشهري ٧٠٠٠ دولار و كلامك صح غالباً لو حد دخله الشهري ٧٠٠٠ مش هيشتغل ، بس انت غلطت في حاجة : انك افترضت ان معدل التعدين الحالي مستمر للأبد ، ده لوحده كده بينزل اول كل شهر في المتوسط ٥-٧ ٪؜ شهري ، ده و احنا كمان بنتمرجح بين ٤٥-٥٠ مليون معدن اغلبهم نايم مش بيعدن اصلاً ، تخيل معايا بقي كده صحينا الصبح لقينا العملة خدت قيمة حقيقية ، كام مليون / مليار شخص هيبتدي يعدنها بسبب انها بقت بقيمة حقيقية ممسوكة ؟؟ 
متخيل سرعة التعدين هتبقي كام ساعتها ؟؟ عملة كل سنة / كل ١٠ سنين / كل ١٠٠ سنة !! الله اعلم 

طيب هنفرض ان ال ٥٠ مليون مُعدن بقوا اغنياء ثراء فاحش من رزق ربنا ليهم في الباي ، و بطلوا يشتغلوا ، هل معدل البطالة في الكوكب هيزيد و لا هيقل ؟ 
هتقولي هيزيد ، هقولك غلط لازم يقل طبعا 
هتقولي ازاي ؟؟؟ 
هقولك اه فيه بتاع 0.5 % من الكوكب بطلوا يشتغلوا ، بس قصاد كده كام مُعدن باي فتح شركات و محلات و ابواب رزق لناس كتير غلابة مش لاقية شغل و قلل البطالة في بلده 

مشروع الباي فلسفته الاساسية القضاء علي الركود و البطالة في الكوكب كله ، بعد فشل كل الانظمة المالية السابقة اللي بيضربها التضخم و الركود و يكونوا السبب في انهيارها.
الفقير مننا لما يمسك فلوس هيبقي هيتجنن و نفسه يساعد كل اللي حواليه و يفتح ابواب رزق و شغل لكل حبايبه 
لكل واحد هيبطل يشتغل بسبب رزق ربنا اللي جاله من الباي - فيه ١٠٠ شخص كان عاطل و اشتغل معاه في محلاته و شركاته.
شوف انت بقي معدلات البطالة العالمية هتقل كام في المية :ok_hand:

————————————————————-

٥- دكتورنا الغالي التحية ليك والتقدير:

مع إننا يا دكتور إتكلمنا سوا كتير وسعدت بجد بشرحك الفوق ممتاز واللي بيديني طاقة إيجابية وكمان لو هنتكلم بالمنطق فأكيد الباي هتكون حاجه كويسه إن شاء الله وإنما لحظات الشك بتيجي من أكتر من زاوية جايز يتفق معايا أو يختلف البعض إنما أقدر أوضحهم في ٣ نقاط:
 
النقطة الأولي : 

العقل احيانا لا يصدق يقينآ إزاي ممكن تكون ثري بين يوم وليلة لأننا طول عمرنا متعودين علشان تلاقي قرش لازم تتمرمط شغل قدامه لأننا ببساطة من الطبقة الفقيرة والمتوسطة فمش بنلاقي القرش بالسهل وكمان عقلك وقلبك يقولك ازاي عمله بتتعدن ع التليفون تكون عملة تسوية دولية أو حتى إن سعرها يوصل الاف الدولارات.

الإجابة : 
مافيش حاجة في الدنيا لها قيمة من نفسها كده حتي الدهب هو مجرد معدن ، احنا اللي بنعمل قيمة لأي حاجة حسب معاييرنا احنا.
البتكوين اللي كان ب 0.00000001 و وصل 69,000 ، كان الواحد بيعدن منه مجاني مئات العملات يومياً علي جهاز كمبيوتر تعبان و بأقل استهلاك كهربة ، ده غير انه كان بيتوزع هدايا في بعض الألعاب ..
الحياة فرص و ارزاق يا صديقي 
اللي استثمر في facebook في اوله وصل فين 
اللي استثمر في amazon في اولها وصل فين 
اللي جاب ارض في الصحراء بملاليم و هوب بقي اسمها التجمع الخامس و المتر بملايين.

لازم ربنا يصطفي مجموعة من خلقه كل فترة و يعطيهم فرصة و خير و امتحان و ابتلاء 
اذا احب الله عبداً ابتلاه 
الفقر ابتلاء
و الثراء ابتلاء أصعب لو كنتم تعلمون 
هتنبسط انت و تنسي ربنا او تنسي اخواتك اللي ما خدوش نفس فرصتك دي ؟
و لا عينك في وسط راسك و ايمانك و علاقتك بربك تزيد ؟
،هتطعم كل مسكين ؟ و لا هتقول انا اللي كنت مفتح و حويط و عرفت المشروع و فهمته اوي و انا ناصح اوي و الفلوس اللي جاتلي من الباي دي مجهودي لوحدي و ماحدش له دعوة ؟ 

يقول الله في محكم آياته : 

قَالَ إِنَّمَا أُوتِيتُهُ عَلَىٰ عِلْمٍ عِندِي ۚ أَوَلَمْ يَعْلَمْ أَنَّ اللَّهَ قَدْ أَهْلَكَ مِن قَبْلِهِ مِنَ الْقُرُونِ مَنْ هُوَ أَشَدُّ مِنْهُ قُوَّةً وَأَكْثَرُ جَمْعًا ۚ وَلَا يُسْأَلُ عَن ذُنُوبِهِمُ الْمُجْرِمُونَ

صدق الله العظيم 

————————————————————

٦- النقطة الثانية : 

ديمآ كنا نربط أحداث معينة بظهور الباي زي أخبار وخلافه وكمان ايام عيد ميلاد الباي ونقول إن شاء الله حاجه في الأيام دي فنحبط، طبعا الكورتيم مصرحش إنما هو كمان محددش وقت معين وساب الأمور مفتوحة بكلمة or later . فبقى عندنا شك هو لحد إمتى هننتظر ؟ حاليآ رابطينها بالتشريعات وده الظاهر فعلا وإن ربط الأحداث حقيقي ده كله بسبب إنهم منتظرين التشريعات بس هل القلب مطمئن إطمئنان كامل لده ؟ معتقدش لأن للأسف الناس مقلقة من العكس وإن جايز ميحصلش حاجه.

الاجابة :
المشروع ده عامل زي بناء عمارة بالظبط ، خدوا تراخيص البناء بس ما خدوش تراخيص البيع للسكان .
عملوا شركة social chain و رخصوها في اكتر من دولة ، و عملوا اساسات العمارة ( ال blockchain و ال browser ) و حطوا شوية عمدان ( ال applications )
باقيلهم ياخدوا رخصة انهم يبيعوا الوحدات ( التشريعات )
المشروع في اصوله امريكي ، و لحد من اسبوع فات كان فيه قضية مرفوعة علي شركة ripple و عملتها xrp
سنين طويلة  قضية شغالة علشان بس هل الxrp  تعتبر security و لا commodity
اه والله العظيم :joy: سنييييين علشان يحسموا هي ايه اصلا
سوق الكربتو بالكامل قايم علي اساس هش جداً ، مافيش تعريف لأغلب مصطلحاته
حتي العملات المستقرة stable coins زي usdt و غيرها مالهاش ضوابط في اي حاجة.
طيب ازاي يقدروا يعتمدوا في حياة رقمية بالكامل
علي تنظيمات هشة زي دي ؟؟!
عملتنا امريكية و مستنية الضوء الأخضر  الامريكي من بلد منشأها علشان تنطلق سواء كمقايضة بس او كعملة تسوية .

و الكل شغال بالتوازي
تشريعات هونج كونج خلصت
و اوروبا ( ال MICA ) خلصت

باقي الوحش الكبير ، ماما امريكا ، و نتوكل علي الله 

و طبعا كده انا جاوبتك عن ليه كان فيه تعتيم رهيب من الكور تيم ومافيش اي مواعيد لأي حاجة ؟؟
ببساطة لأنك ما تقدرش تقول للناس تعالوا استلموا شققكم و انت لسه مش معاك رخصة للبيع اصلاً ،
تطلع الرخصة و يبقي لينا كلام تاني :ok_hand:

—————————————————————

٧- النقطة الثالثة :

فيه كتير مشاريع كانت بتقول أنا وأنا وراحت في مهب الريح وحاليا برضه فيه مشاريع تانيه بتقول انا وانا وليها ناسها وكل فئة بتناصر عملتها وشايفه عملت غيرها إسكام طبعا كل دول مش بقوة الباي لأنها مختلفه جزريآ إنما احيانا نقول ليه ميكونش فعلا الباي مش هو المشروع اللي هيحقق أحلامنا ويكون مشروع عادي لأن الباي بالنسبالنا بقى حلم كل واحد فينا اللي هيطلعه من المرمطة للعز.

الخلاصة: الناس من كتر ما شافت في حياتها كلام كتير بدون واقع حقيقي مبقاش عندها أمل إن فيه حاجه حقيقة إلا لما تتحول لواقع ملموس وتعيشه فعلآ، لأننا طول حياتنا بنسمع بتغييرات وخلافه وده مبيحصلش، هو ده مربط الفرس.

الإجابة :
مش علشان واحد بيقول الباي مختلفة تبقي هي فعلا مختلفة.
احنا مش بنصدق الكلام المرسل
احنا بنصدق عقولنا اللي درست المشروع ، اللي هو والله فريد من نوعه ، مشروع الباي ناجح مش علشان احنا بنقول انه هينجح ، المشروع ناجح علشان مقوماته كده ، كل مواصفاته إما فريدة و إما نقاط قوة يتفوق فيها عن اقرب منافسيه ب سنين ضوئية.

مش معني انك كل ما تشتري بطيخة و تطلع بايظة ان البطيخ فاكهة من الأساس بايظة ، المشكلة بتكون انك ما فحصتش البطيخة كويس ، لو كنت فحصتها و لقيت كل مقوماتها بتقول انها ممتازة ، لما تفتحها و تاكلها تفتكر هتلاقي طعمها ايه ؟ :slight_smile: ألف هنا 

——————————————————-

انا طولت عليكم أوي أنا عارف :hibiscus:، بس حاولت أغطي كل النقط اللي مخلية اخواتي قلقانين .

لو أي حد من اللي قروا المقال ده عنده قلق او تخوف من نقطة غير مذكورة في ال ٧ نقط ، يكتبهالي في التعليقات و انا ان شاء الله اجمعهم لو اكتر من نقطة و نعملهم بوست تاني منفصل .
و لو اي أخ عاوزني في سؤال محرج يطرحه علي العام  فأنا تحت امره يراسلني خاص .

و اخيراً بكرر انا علي يقين كامل من الباي و شايفه اكبر استثمار ربنا رزقني بيه في حياتي ، و حبيت ان نفس اطمئناني ده يوصل لكل واحد قلقان، فإن أصبت فمن الله و ان أخطأت فمن نفسي و الشيطان.

يا ريت لو كنت فعلا قلقان من نقطة و استفدت ، سجلها عندك علشان تساعد انت كمان علي نشر الطمأنية.

والله من وراء القصد..

و دمتم بخير.

السلام عليكم :hibiscus: